بيىل استانادا  8 مەكتەپ ءۇش اۋىسىمدا جۇمىس ىستەيدى. قالا اكىمدىگى  مەكتەپتەردىڭ ءۇش اۋىسىمدا جۇمىس ىستەۋىن حالىق سانىنىڭ كوبەيۋىمەن ءتۇسىندىرىپ وتىر.

"دەموگرافيالىق جانە كوشى-قون پروسەستەرى ەسەبىنەن وقۋشىلار كونتينگەنتىنىڭ جىل سايىنعى وسۋىنە بايلانىستى بۇگىندە قالا بويىنشا 8 مەكتەپ ءۇش اۋىسىمدىق رەجيمدە جۇمىس ىستەيدى. 2025 جىلعا دەيىن وقۋشىلاردىڭ ورىن تاپشىلىعى ماسەلەلەرىن شەشۋگە ارنالعان «جايلى مەكتەپ» ۇلتتىق پيلوتتىق جوباسىن ىسكە اسىرۋ اياسىندا ەلوردادا 44 400 ورىندىق 24 مەكتەپ سالۋ جوسپارلانعان"، – دەلىنگەن رەسمي جاۋاپتا.

بۇل تۋرالى  Halyq Uni پورتالى حابارلادى. اتاپ ايتقاندا،  №27 مەكتەپ-ليسەيى، № 37 ورتا مەكتەبى، № 53 مەكتەپ-ليسەيى، № 59 مەكتەپ-ليسەيى، № 79 مەكتەپ-ليسەيى، № 83 مەكتەپ-گيمنازياسى، № 85 مەكتەپ-ليسەيى، № 89 مەكتەپ-ليسەيى ءۇش اۋىسىمدا بالا وقىتادى.

اكىمدىكتىڭ حابارلاۋىنشا، مەكتەپ ماسەلەسىن شەشۋگە 76،9 ملرد تەڭگە بولىنگەن.

"2023 جىلى ەكى اۋىسىمدا 16 600 ورىندىق 11 مەكتەپ  قۇرىلىسىن اياقتاپ، پايدالانۋعا بەرۋدى جوسپارلاپ وتىرمىز. ءبىلىم بەرۋ ينفراقۇرىلىمىن قولداۋ قورىنان 21،9 ملرد تەڭگەگە 10 مەكتەپتىڭ قۇرىلىسى قارجىلاندىرىلادى"، – دەيدى استانا اكىمدىگىنىڭ باسپا ءسوز قىزمەتى. 

ەسكە سالا كەتەيىك، استانادا جالپى ءبىلىم بەرەتىن 101 مەملەكەتتىك مەكتەپ بار، سونىڭ ىشىندە 35 قازاق، 3 ورىس جانە 63 ارالاس مەكتەپ بار.